《ꌋꇉꇁꄿꇓꂵꄀꇗꁧꑭꄔꉙꇖꈭꀕ》

ꀋꅞꉖꃅꈊꆪꑭꇂꃴꌋꎳꄉꉪꇁꌊꌋꇉꇁꄿꑟ，ꐋꀨꏂꁬꂶꌠꏃꄉꋙꋠꈭꐨꆏ，ꉪꊇꎞꌋꇉꍔꇬꃥꈿꅉꂷꇬꄉꑬꆏ。ꈝꃀꏡꌠꈭꎴꈜꎴꄉꑬꐚꌠꋍꁁꏭ，ꂵꆧꑌꃅꊸꃪꄉꁁꑭꀕ。ꈀꄸꑌꊼꇅꏷꐞꏭꃅꐛ，ꀆꐒꍈꃬꈁꑓꌍꇬꇈꑬꆏꇬꀀꌐꀐ。ꀀꑌꃹꒉꃹꀋꒉꇄꌠꇬ，ꌍꑓꉈꏭꒈꏾꎭꀕꑠꍈꇫꈌꐚꇬꎷ，ꌋꇉꇁꄿꑠꇬꏭꆹ，ꁧꃪꀊꂥꌠꐛꌠꉬꀐ，ꉢꉪꇬꒉꏾꋋꍈꆹꃪꊼꇅꀊꂥꅉꇬꄉꊰꇁꍈꉬꄡꑟ，ꑠꅹꒉꏾꂾꃚꑌꀉꒉ。ꉠꄿꐨꃅꉪꐨꋋꍈꉢꉉꐋꀨꈬꁬꂶꌠꇰ，ꒉꏾꋋꍈꑌꀊꄙꑵꉙꑵꌠꀋꏮꂆꃚꌞꅲꇢꈻ，ꋋꑌꃆꏂꄑꄔꉙꐺꀐꌠꉬꋭ。ꉣꑊꆹꒈꏾꉙꇁꑵꃚꅲꄉꀀꑌꃹꀐ。ꃅꄜꃀꃬꀮꑍꇬꇴꌠꉢꈨꀐ，ꄚꊼꇅꐙꄏꏭꃅꐛꄉ，ꄓꉚꀋꑍꃅꎍꑴꌦ，ꀊꉗꍈꀋꐛꇬꆏꐋꀨꏂꁬꂶꌠꄆꅇꇫꑟꇁ，ꍮꊪꌌꉪꋩꇁꇶꌠꑳꇂꃴꄉꇁꉚꄉꀐꄷ。ꌞꊿꇁꉚꇧꏦꌠꉨ，ꉪꈍꑋꑹꌠꉆꐥꃅꐮꀀꄖꇈꑣꄓꏿ。ꃅꎸꄮꐰꆏꑓꂿꏜ，ꉪꄓꑳꇂꃴꑞꄮꇬꆏꑓꂿꄇꇖꀕꀐ。ꏦꈜꇬꊿꆏꒉꉢꇁꃅꇫꐺꌐꀐ，ꄿꏀꇂꁮꅸꌠꇫꈴꆹ，ꀉꑳꑮꆜꍲꈷꏋꇅꀕꑠꑌꐮꐊꇫꈴꆹ，ꀋꃀꀉꑳꀏꁵꄩꄌꂴꈻꊁꌌꃅꌠꑌꇫꈴꆹ。ꀉꁌꀊꂵꄯꁯꄙꌠꑌꇫꈴꆹ。ꋀꊇꈀꄸꑌꇓꂵꄀꇗꁧꑭꌋꇉꇁꄿꄔꊒꈩꅉꍇꌠꇬꉜꄉꆹꌠꉬꅊꇈ。 

ꌋꇉꇁꄿꄔꈩꅉꍇꌠꆹꇓꂵꄀꇗꁧꉬꄷꁦꌺꑍꍈꇂꃴꐛ，ꋋꆹꄸꉺꃰꇌꈭꑠꍈꉬꄉ，ꀋꇊꆏꊿꄻꄉꌠꄔꈩꅉꑠꍈꌡ。ꉪꇫꑟꆹꄮꇬꆏ，ꉹꁌꄔꊒꅈꇬꈩꇁꈧꌠꆹꆈꃅꆈꏪꀕ，ꄔꊒꈩꅉꃰꇌꈭꋋꂷꉜꄉꑋꅉꀋꊌꃅꎍꌐꀐ。ꀊꉗꀋꐛꇬꆏ，ꀊꄙꑵꉙꄔꋩꄔꈩꇖꈭꀕꑠꊱꇫꈌꐚꇁꇈ，ꉢꏮꇁꀍꉀꉜꇬꆏ，ꀉꐔꅪꎔꆫꁯꀊꏂꌌꈧꌠꇓꂵꄀꇗꁧꑍꍈꌠꇂꃴꄉꀁꋌꄔꈩꅉꇬꉜꄉꇁ，ꋀꊇꆹꇇꇀꃼꁆꏯꌠꆏꁀꁱꈧꌠꐒꐯꄀꄉꌌ，ꇇꇁꂾꁆꏯꆏꆫꁯꀋꏂꌌ，ꑵꃚꇖꈭꀕꌠꐊꄉꎆꃅꎆꇌꀕꃅꀁꋌꉜꄉꇁ，ꋀꊇꇁꌊꄔꈩꅉꃰꇌꈭꂶꌠꇬꄉꐮꊂꈹꄉꃰꇌꋍꃅꑠꈍꑋꏮꋀꏮꄚꁵ，ꈭꀕꇍꀕꑌꌠꆫꐋꈧꌠꆹ，ꇇꁮꏪꇱꀋꏦ，ꁰꒌꍑꇱꀋꏦ。ꋍꂷꋑꀋꋒꑊꑍꒊꆭꀕ，ꒉꇁꉏꃚꆫꁯꀊꏂꐊꄉꁧꇁꇉꉺꐺ。ꄔꋩꄔꉙꇖꈭꀕ。ꉪꊇꈍꑋꑹꌠ，ꁰꒌꍑꌠꍑ，ꑴꁱꇊꌠꇊ。ꌌꇁꉪꆃꎭꈨꏀꄜꁊꈯꄜꈨꏀꃑꅉꈧꌠꇬꄉꀒꃑꑟ，ꐋꀨꃄꇖꄹꊂꐥꌠꃅꌋꇉꇁꄿꄔꊒꅉꇬꅇꇊꉙꌠꋀꊇꂿꌐꀐ，ꌋꇉꇁꄿꄔꊒꌒꐨꑌꃄꇖꄹꊂꀋꑟꅈꀋꐥꀐꋭ。

ꅇꇊꉙꌠꌐꈭꐨꆏ，ꄔꊒꋓꈿꅉꇬꑟꀐ，ꀋꃅꋌꃢꌋꇉꇁꄿꊒꅉꇬꆏꀈꑣꇱꌠꐥ，ꑻꇁꁿꌠꐥ，ꇂꁮꁻꌠꐥ。ꋓꈿꋋꈨꋍꑵꇈꋍꑵ，ꊿꇬꉚꏾꐯꏾꑠꀉꄂ，ꀈꑣꇱꅉꇬꍤꁆꅶꁉꆗꌺ，ꌟꈄꀃꂓꄜ，ꊋꌠꀑꑊꁤꇅꀕ，ꄇꈤꇬꇱꇁꀬꌠꆹꀉꇨꂷꇬꀋꐊ，ꑠꅹꊋꀋꐛꈧꌠꑌꎲꄏꌠꀋꐥ。ꑻꇁꁿꅈꇬꆏꐱꇁꀭꄮꀀꌠꇫꑟꇁ，ꏪꐦꇁꄿꀀꌠꑌꇫꑟꇁ，ꁿꅉꇬꊋꐛꄉꑿꇁꌊꁈꉌꃀꒊꌋꀕꃅꁧꌠꐥ，ꊋꀋꐛꌠꀋꁧꀉꌺꑽꀋꐥꄷꐮꈐꊟꊋꊡꄉꁧꌠꐥ。ꋓꈿꅉꇬꊿꀊꅰꃅꈀꄸꑌꇫꊂꈹꌠꆏꇂꁮꁻꅉꇬꉬ。ꌋꇉꇁꄿꋌꈚꆹꀃꌋꀊꆨꇯꆐꇂꁮꂓꅑꌠꅐꑠꈚ，ꍔꇬꐋꀨꈧꌠꌧꉪꇰꇬ，ꀋꃅꌋꇉꇁꄿꋌꈚꇬꇂꁮꁻꇌꋋꈨꋍꉐꎖꏢꐥꄷ，ꇂꁮꌊꁈꉌꃀꉔ，ꋀꊇꆹꇂꁮꉘꄉꇈꇿꇬꊒꆏꌌꇿꇬꁻꁧꇬꎷ，ꀋꃅꋌꃢꌋꇉꊑꅉꇬꑌꇂꁮꀉꑌꐯꀉꑌꈨꇬꑟꇁ，ꇂꁮꆹꇴꒉꉺꒉꑠꀉꄂꄉ，ꇂꁮꁺꅉꇬꆏ，ꂤꏂꆲꐊꄓ，ꈑꋍꁎꉔꀕ。ꇂꁮꐮꁻꋓꌠꆹ，ꂒꉻꃆꂮꃅꄉꋓꌠꉬꈭꐨ，ꌋꇉꇁꄿꇂꁮꌊꁈꉌꃀꄷꈐꁍꁈꊋꃤꃆꂮꋓꌠꉬꑴꌦ，ꑠꅹꆀꃅꆈꌠꋊꃅꋻꅑꉪꇐꈐꏭꆹ，ꇂꁮꁺꀕꀃꃤꊊꑟꉂ，ꃆꇭꃧꃨꀀꃤꇭꑟꉂꇬꎷ。ꋋꆹꆈꌠꋋꁯ，ꋊꃅꁰꁱꋻꅑꍸꇐꐪꊛꅸꀃꑍꋍꄮꑟꌠꑇꇐꉌꊈꉬ，ꋋꆹꊖꆈꋋꁕꆈꌠꌧꇐꁰꁱꀋꑍꀋꈤꌠꁢꊧꉫ。 

ꃰꊿꉌꃀꌒ，ꈩꇁꌑꅉꐥꇬꆏ，ꄮꈉꆹꉙꀕꐚ。ꀋꋓꀋꉪꄷꆏꁯꋒꃄꒌꏭꄮꑞꌦꀐꅊꇈ。ꌋꇉꇁꄿꇓꂵꄀꇗꁧꑭꄔꊒꄔꈩꅉꇬꋓꈿꌠꆹꌐꒉꂯꄉꀐ，ꉪꊇꑌꊭꄎꄉꀁꋌꁧꂿꄷꀐ，ꌋꇉꇁꄿꄔꋩꄔꈩꅉꇬꄔꊒꂷꇭꋋꊏꆹ，ꈍꄮꑌꉪꊇꉌꃀꈐꏭꄉꁤꇅꀕꇬꎷ。ꃆꏂꊂꑋꉪꊇꏮꌊꌋꇉꇁꄿꊒꋩꊒꈩꇁꌦꑴꌦꄡꑟ。